L'omu cerca i soddi 'nsichitanza
cummintu ca sunnu di ranni 'mpurtanza.
Tutta a vita i cerca cu affannu,
ma di truvalli, nun sapi mai quannu.
Quasi sempri sta ricerca è senza fini,
ma a spiranza, ci rinasci tutti i matini.
Ogni tantu, però c'arrinesci
e picca ci manca ca pazzu nesci.
Si n'adduna, passatu u primu mumentu,
ca sulu ora, 'ncumincia u veru turmentu.
'Nta testa hanu aumintatu i pinseri
ca mancu a notti dormi e s'arriseri.
Pi prima cosa pensa su a sabbari,
qual'è a megghiu cosa pi falli fruttari.
"Ora i mettu a banca e pigghiu l'interessi,
ma ca svalutazioni, cò tempu su pessi!
Ora cercu di l'amici u cunsigghiu!
... Ma forsi è megghiu ca nun u pigghiu!
Forsi, spinnili è a vera soluzioni,
... ma poi, tornu 'nta vecchia situazioni!
E su mi scippunu i dilinquenti!"
Macari stu pinseri, ci furria 'nta menti.
" Pirchì m'attruvari 'nta sta situazioni,
ca ci pensu e nun trovu a soluzioni?
Era megghiu su nun aveva nenti,
ca almenu cueta aveva a menti.
Cuntintizza i sordi mai hanu purtatu
a cu di nicu nun c'ha statu abituatu.
Acchiù nun mangiu 'nta lu iornu,
e tutta a notti nun pigghiu sonnu.
Tantu a disidiratu 'sta ricchizza,
ma chi pinseri a divintatu 'na munnizza".
ALFREDO OSSINO
Nessun commento:
Posta un commento