TURMENTU

Sugnu n'impiegatu e 'un mi lamentu,

varagnu milli euru ogni misi

ma arrivu a jornu quinnici cu stentu,

dicitimi si chista nun è crisi.

Nun pozzu stari jò cu stu turmentu,

nun vogghiu surari chiù di tri cammisi;

nun merita, di certu, un munumentu

cu ruvinau, amici, stu paisi.

Li ricurdati ancora i milli liri?

Addivintaru un euru netti netti;

certu, sta cosa, nun si po capiri,

cca nni spunnaru a tutti li sacchetti.

Sulu stu fattu vali e l'aju a diri:

"Ii du' miliuna 'un eranu pirfetti,

ma certamenti nuddu 'u po smintiri

chi s'arrivava, almenu, ò vintisette".

A fari 'a spisa c'è di jittari vuci,

t'à fari 'I cunta prima chi ci trasi;

taliàmu 'I prezzi e semu misi 'n cruci,

nni nèscinu di 'n mucca certi frasi.

Soccu accatti accatti, sai, t'abbruci

e pigghi puru focu in certi casi,

vulissi fari 'u bravu, 'u bonu, 'u duci,

ma sutta di mia nun viu cchiù li basi.

La cosa è gravi e nun c'esti soluzioni,

'n aumentu di stipendiu è comu un ternu;

cca p'aggiustari un pocu 'a situazioni

ci vulussi 'a manu "santa" d'u guvernu.

Mi pari, 'nveci,  è chista è n'opinioni,

chi tant'assai iddi nun ci tennu,

a postu di dari lèvanu 'a razioni

e nni mannaru a tutti dintra 'u 'nfernu.

NINO BARONE - Trapani, 25 novembre 2004