Mi ricordu, quann'era picciuttedda,
cu li quasetti curti e scocca 'n testa.
Jucava pi la strada, a sataredda,
filastrocchi cuntava a lingua lesta.
Figghia sula, ma picca sminzigghiata,
jvi a la scola e ghivi a la dottrina.
Essennu picciridda spinzirata,
jucava cu la pupa, la matina.
Mi misiru li morti 'na pupidda:
di zùccaru e tutta ben pittata;
la notti spissu mi sunnava a idda,
la spizzicava ed era 'ncilippata.
Allura nun pinzava a li pruvugghi,
misa a lu specchiu, pi farimi bedda.
Ma sintia di me' matri li cunzigghi,
e mi piacia jucari a li ciappedda.
Ora chi sugna ranni ed haiu famiglia,
cchiu' nun dormu ' mta li vrazza di me matri.
Lu pisu di la casa m'assuttigghia,
e l'amuri e lu cori è dari ad altri.
MARIA TERESA CASSARA'
Nessun commento:
Posta un commento